Mängisch, wenn i es Gspröch ha und es Zytli rede mit Öpperem, de chas sii, dass mi plötzli dunkt „mou, jetz weiss i, wer das isch, wo do mir gägenüber isch, jetz chumi druus. Jetz macht sie mir nüt vor, es het kei Fassade meh, jetz chani si i ihrem ‚Mönsch-Sii‘ gseh, jetz isch si eifach ‚Mönsch'“. Und gliichzytig ben is denn ou: ‚eifach Mönsch‘. I ha mers lang überleit, wien i das söu beschriibe und i finde kei anderi Wort, aus ebe eso, wien is gschribe ha. I weiss eifach, wenn das passiert, denn sind das koschtbari Momänt.
